باب ما جاء في النفخ و التنسيم من عجايب الحريم .. ( على بلاطة )

.

.

.

الجزء الأول

المكان : غرفة النوم ، الساعه خمس إلا نص .

إحسآس تحادث نفسها.. :

يالله إلى متى وانا قبيحه ، إلى متى و انا كل ما شافني قطو يمشي فوق جدار الحوش نط للبيت الثاني من الروعه ، إلى متى و أنا السبب في كوابيس ورعان الديره ..! ، حتى المعرس ماجاء من قبح وجهي .. الله ياخذ وجهي و يعطيني بداله مثل وجه منيره بنت عمتي حصّه ، ولو إن وجهها موب زين مرّه كانه وجه مريم نور أول ماتقوم من النوم بس ولو ماشي سوقها والحين أعرست وخلّفت عشرين صبي وهي توها ما وصلت سن الثلاثين <- والله لو إنها أرنب ؟

جلكسي( تفتح درج الكومدينه وتطلّع صورة الوالد ) .

أنا أموت و أعرف ليه يا يمّه ليه أعرستي على هالآدمي ذا مب آدمي ذا دريل هدم حياتنا .. مالقيتي إلا ابوي تعرسين عليه ، من وين بيجينا الملح وذا شكل أبوي .! أنا أموت و أعرف يومنتس شفتي ابوي الشوفه الشرعيه وش اعجبتس فيه وخلاتس تقولين موافدزه كل هذا عشان تعرسين ما همتس يجيونتس بنات ويقعدون بحلقتس و مايعرسن ..

إحسآسوهـ تدرين وش امنيتي بالحياة .. ؟ ، أمنيتي إني اقوم من النوم و انطل بطانيتي الوردية المنقّشه بقلوب حمر ، و أطمر ع المراية و شعري يهفهف وراي بالهوا <-- ماوكلي؟ ، همن ابدا اتمقل وجهي و جمالي .. تذكرين آخر مرة شفت وجهي بالمراية؟ اغمى علي يوم(ن) كامل ..! و صحيت من باتسر لقيتكم مغطين المراية بقصدير !

إييييه بس مالنا إلا الخطّابه ( أم حسين ) هي اللي بتحل مشكلة العنوسه ، و منين نجيب رقم هالخطابه ..! ما تدرين ذاك اليوم وأبوي يعبي السياره بنزين إلا المح الرقم ملزق بورقه على جدار المحطّه وأنا اللي أنقشه عشان اليوم الأسود عارفه إن مستقبلنا رايح فيها من طلعت على الدنيا و شفت وجه الوالد بغرفة الولاده

.

.

- الخطّابه و الشوفه الشرعيه :

وأنا اللّي ما أصدّق على الله و آخذ الرقم وأدق على الخطابه أم حسين ..

إحسآس : الوو ..

الخطابه أم حسين : الوو نعم من معي

إحسآس : معك إحسآس دلخهـ .. انتي الخطابه أم حسين اللي تجمعين راسين بالحلال

الخطابه أم حسين : إيه أنا أجمع راسين بالحلال وبغاية السريه إن بغيتي نرسل المعرس بملف اخضر علاقي ممكن نسويها لتس عشان نحافظ على السريه التامه .. بس كل اللي عليك ترسلين لي مواصفاتتس كامله ومواصفات المعرس اللي تبينوه وصورة من بطاقة العايله وشهادة حسن سيره و سلوك .

إحسآس: والله لو إني بقدم عندكم على وظيفه ..!

الخطابه ام حسين : نعم !!

اقول ابشري ابشري باتسر برسلتس صورتي وصورة اختي والمواصفات محنب متشرطين اللي يجي من الله حيّاه الله ولو تبين تاخذين المهر و المؤخر والصداق كلّه موافدزين بس اهم شي نطلع من صندقة العنوسه ونسافر ماليزيا ونصير نركب قدام بالسياره ..!

سكرت التلفون .. ورحت استعد أنا وجلكسي للتصوير .. قبل لا نروح جلسنا نحط مكياج ونبربس بوجيهنا .. ماكان عندنا كريم أساس يخفي السبع طعشر ألف عيب الموجود فينا .. جبنا دقيق ابيض وكبيناه بوجيهنا .. ما بقى لون ظل ماحطيناه بعيونّا .. أصفر واخضر واحمر وما خلق الله .. ولا بقى روج ماحطيناه في براطمنا .. كل هذا عشان نخفي ملامح وجيهنا الشينه ونصير أحلى حريم الديره
صورنا بعد ما صورنا القبح والشين مازال موجود .. اللي يشوف صورتي يقول هذه زكيه زكريه مسوية ريجيم .. و جلكسي طالعه كانها بنت فيفي العبده .. قلت يابنت والله مالك إلا صور منيره ناخذ صورتين وحده ملوّنه ، و الثانيه ملونه بابيض و اسود ونرسلها للخطّابه ولا من شاف ولا من درى ..

من اليوم الثاني و بدى مفعول الخطّابه يشتغل .. إلا ويدق التلفون و قلوبنا تدق معه .. انا و جلكسي مسكنا يدين بعض وجلسنا ندور ونصايح نقول مع بعض :

هيه هيه المعرس وصل .. ويا منيره روحي قطعي بصل ..
ام حسين الخطابه العسل .. شعارها بالخطبه اتصل نصل ..

<- الدبش قاعدين يغنون ومخلين التلفون يرن ، مير أشوى جت الوالده وردت وطلعت حرمه عجوز يقالها ام خالد تبي تخطب لولدها الكبير والصغير ، وافقت الوالده موافقه مبدأيه وحددت موعد الشوفه الشرعيه بدون تردد لأن الوالد حالف عليها يمين إنها ما ترد أي حرمه تتصل تخطب حتى لو إنّها مروجة حشيش وعيالها مدمنين مخدرات ..!

جلكسي: شوفي إنتي لتس الكبير و انا لي الصغير

إحسآس : على كيفتس هو .! منهي اللي مكلمة الخطابة ؟!!

جلكسي و منين لتس الرقم انتي و هالفيونكة اللي فوق راستس ، ارفعي هالراس وجع من ثقل هالفيونكة راستس متدودل على قدام

ترن ترن طن طن ترن طن .. صوت الجرس يعلن عن وصول أم خالد وعيالها ( حتى الجرس صوته شين )

طمرت الوالده تفتح الباب .. و ليتها ما فتحته

طلعت أم خالد : ( عجوز مخضرمة ما فيها إلا ضروس .. يعني أول مرة بحياتي اشوف طقم اسنان يمشي و يحتسي بلحاله .. دخلت تسبقها ريحة البصل الظاهر شابت(ن) ع الغدا و جاية.. و راها تفخين يدربون روسهم خالد ، و الدحمي )

أم خالد تحتسي مع امي ويتناقشون وش لهم ووش عليهم ووش هي شروطنا و عيال ام خالد كل واحد قاضب( ن) بيده صورة لمنيرة ، واحد معه الصورة الابيض و الاسود .. و الثاني معه الصورة الملونه .. و كل واحد حالفن ع الثاني ما يشوف مرته < -- جت من ربي و الا كان كفشوهم من أولها

و أخيراً جت اللحظة الحاسمة .. جلكسي تشد الفيونكة صح و تدخل مع الباب ، امي ع السجادة تدعي .. و ابوي له يومين معتكف بالمسجد أول مره يعتكف بحياته وأنا مغمضه عيوني .. البيت في حالة استنفار ..

صرخة مدوية في البيت .. خالد عظ ثوبة و حط رجله ..

فتحت إحسآس عيوني و اتذكر ان التسلبة الجربا جلكسي ما تسبحت لها شهر

أم خالد تنغز الدحمي .. قوه يا وليدي " دي عايلة واطية ونصابه وهاتوا الفلوس اللي عليكوا " اخس يالعجوز الشمطا ..

طلعوا من البيت ، وإحسآس الحقهم : غش غش ما جاء دوري .. ما وعيت إلا و شحاطة العجوز أم خالد ماشيه 180 و تصك بجبهتي ..

ام خالد وكالة رويتر الحارة ، نشرت عننا الأتساذيب و الشائعات و اتهمتنا بالنصب و التلاعب و دخّلت الخطابة ام حسين بالسالفة و انها مشتركتن معنا بالعملية الارهابية عشان نسرق عيالها منها ..
الله اكبر ياذا العيال ، لو يعطوني اياهم ببلاش ما خذتهم <-- الجملة الاخيرة مهيب من قلب ترا

الخطابه أم حسين كانت عايشه على الله وعلى هالفليسات اللي تجيها من تزويج الناس .. لكن من بعد ما تعاملت معنا وسوقها طايح معاد أحد يدق عليها ولاعاد صارت تشرب ميرندا ..

مر ت الأيام على هذه الحاله .. كل ماجاء أحد يشوفنا شوفه شرعيه إمّا إنّه ينحاش وإلا تجيه عقده نفسيه من العرس ويكره الحريم لأنه يحسبهن كلهن شكل واحد ( شكلنا ) ، الوالد زهق وطفش من هالحاله إلى درجه إنه راح يكتب على باب بيتنا ( خذ وحده و الاخرى مجاناً ) وبرضوا مافيه فايده ، سمعتنا صارت بالحضيض وكلن درى إننا شيون و ماننفع للعرس ..

بعد مرور شهر .. قرر الوالد يسفّرهم لبنان عشان يسون عملية تجميل ويعدّلون و جيههم و يغدون زيون كود احد يعرس عليهم لو مسيار

سافروا لبنان وآخذواعلى طريقهم الخطابه أم حسين رأفه بحالها .. همآا يسون عملية تجميل .. وهي تشتغل وتجمع فلوس عشان توكّل عيالها إذا رجعوا للديره .. أول ما وصلوا مطار لبنان ورحوا يآخذون شنطهم إلا ويشوفون هيفا وهبي ..سلموا عليها ووهما فاكين الكشره ثنين في واحد متر .. وطلبوا منها تعلّمهم عن اسم دكتور حرّيف عمليات تجميل بحكم خبرتها السابقه .. واعطتهم اسم دكتور و توجهوا للمستشفى مباشرة ودخلوا عند الطبيب وارتاع من وجيههم .. قال وجيهكم يبيلها آلات خاصه مُكلّفه نستوردها من الخارج .. أنا أول مره تمر علي وجيه بهذا القبح .. أول مره اشوف سر طالع في الوجه ..!
تكلفة العمليه حوالي 15000 والوالد ما عطاهم إلا خمسة آلاف ..!

إحسآس دلخهـ وجلكسي قرروا يشتغلون في لبنان عشان يجمعون فلوس العمليه .. إحسآس اشتغلت جليسة اطفال عند عائلة راقيه وبس تتمقل في معاملتهم وقصرهم .. كل يوم مشلّحه لها شي تحسب محد يدري عنها ما تدري إن القصر مزود بكاميرات مراقبه فما كان مصيرها إلا أن انطردت من القصر ، جلكسي قدمت على وظيفه قرسونه عند كباريه بالغلط تحسبه مطعم على نياتها هههههههههه ، من يوم اشتغلت بالكباريه وهي كل يوم مسويه مشكله وجايبه العيد ، كل ما شافت رقّاصة ترقص ، تركت شغلها مع الزباين وراحت تلقط الفلوس من تحتها ماشافت خير ، وإذا شافت أحد موب صاحي و معبي الطاسه قامت تنصحه ، لدرجه واحد من الزباين قالها وش جاب عزتي بحجابي عندنا بالكباريه
كثرة الشكاوي على جلكسي وما كان مصيرها إلا مثل مصير أختها إحسآس وانطردت من الكباريه .. أما الخطابه ام حسين حبّها السيكورتي اللي يشتغل في المستشفى وسحبت علينا . .

انتهى الجزء الاول والحين جيبوا معاكم توكس وببسي وتابعوا معنا الجزء الثاني

الجزء الثاني

بعد ما طلعوا من الكباريه و روسهم مفلّقه بكل متسان مشيت إحساس وجلكسي وعلى وجههم ملامح البئس والضياع ..الشايب مهددهم لو رجعوا للديره وما عدلوا و جيهههم بيضحي فيهما بعيد الأضحى الجاي .. هما ماشين بالشارع في لبنان و ويفكرون وشلون يكملون باقي فلوس العمليه إلا وإحسآس نشوف بريدز مصدّي جنب بقالة ابو شوراب .. وتآخذ البريدز وتنآقز وتصآيح بصوت عالي " لقيتها لقيتها يا جكسي " وش لقيتي انتي ووجهتس !! .. يا جلكسي ماسمعتي عن ذاك البريدز اللي يدعكونه ويطلع منه واحد ضخم شين الملامح بس مهوب اشين منّا ، تعالي بس ادعكه ونشوف وش يطلع فيه .. المهم تدعكه المره الاولى ولا يطلع شي ثمن تدعكه مره ثانيه ويطلع واحد كبير ويقول شبيك لبيك المارد وائل بين يديك <- مارد لبناني ، وإحساس اللي مااصدق على الله وتطلب منه مليونين و ستمية أرض ابي املكها واممم ... ما أمداني اكمل إلا و يقوم المارد يتفل بوجهآ ويرجع للبريدز ..

ما جمعوا فلوس تكفي فقرروا يروحون للدكتور ويشرحون له الوضع على بلاطه كوده يراعيهم بالسعر ، وافق الدكتور وقال بشرط إنه يجرب فيهم حقن وآلات جديده في عالم التجميل يعني وجيههم بتصير فيران تجارب بالمستشفى .. دربوا روسهم ووافقوا ..
سألهم الدكتور : مثل مين تبون نخلّي وجيهكم ..؟ ، وقام يخيرنا بين نانسي واليسا وهيفاء وهبي .. ، لالا يادكتور والله ما عندك نظر وش ذا الاشكال اللي مطلعهن لنا قآلوآ له بصوت واحد ( نبي مثل وجه منيره بنت عمتي حصة أطلق وحده بالحاره وما بقى أحد ما خطبها )

طلعت إحساس صورة منيره للدكتور وقلت له : شف يا دكتور ابي حجم براطمي مثل حجم برطم منيره ابي اذا جيت احط روج يخلص الروج من مره وحده .
جلكسي تتحلطم : ما ذبحني الا حبة الخال بنص الخد مقيوسة صح مهيب مثل ذا الحبة بطرف خشمي كنها نخرور ..

دخلوا غرفة العمليات على طول واستمرت العملية مدة عشر ساعات ، عشر ساعات تحفير و ترميم وترصيص..

طلعوا من العمليه وما بقى مكان بجسمهم إلا و هم لافّينه .. الغريب إنهم طالبين التعديل بمنطقة الوجه بس لكن الظاهر إن هالدكتور قام يجرّب الالات بكل المناطق ،

طلب منهم الدكتور ما يفكون الشاش والجبس مدة اسبوع كامل .. طلعوا من المستشفى و حجزوا للسعودية على طول .. و هما بالطيارة دقوا <-- الله من النصب على خطابة ثانية و رتبوا معها موعد بنفس اليوم اللي بيفكون فيه الجبس و الشاش و المسامير .
وصلوا البيت .. أمهم شالت الجرايد اللي على المراية .. و فارشتن أسرّتهم مفرش فيه قلوب .. و أبوهم مسفهل ..
هالاسبوع كان أطلق اسبوع عآشوه بحيآتهم إحساس وجلسكي .. كان كله حلوم و تخيلات

و جاء يوم فك الشاش إحساس وجلكسي متقابلات بنص الغرفة .. و قافلات الباب .. أمهم و ابوهم على اعصابهم واقفين عند الباب ، أبوهم يدعي .. و أمهم تقول آمين

و فجأه ...

يغشى عليهم من الضحك مرة وحده ..!

باب ما جاء في النفخ و التنسيم من عجايب الحريم .. ( على بلاطة ) Ay626382

باب ما جاء في النفخ و التنسيم من عجايب الحريم .. ( على بلاطة ) Ay626382

جلكسي اصبري اصبري بجيب العطور والارواج بصفهن على لحيتس اللي كنها كومدينه

إحساس : بسم الله بسم الله .. سكنهم مساكنهم ..
يللللللعن بليستس وين الخشم اللي يقول عنه الدكتور بيخليه سلة جح مدري سلة سيف .. أنا ما أشوف خشم ما أشوف إلا مقفا دجاجه بنص وجهتس ، وإلا جبهتس حدّث ولا حرج أنا أتوقع جلكسي من يوم ورايح بيجون عيال الجيران يفحطون بالسياكل بجبهتس هاللي كنها ملعب كرة قدم وإلا عظة البراطم تقل وحده فيها بواسير وإلا بتنزل ركّاب ومعيين ينزلون

شوفي خشتس بالمرايه بس أنا أول مره أشوف عيون و خشم متقاطين بالمكان .. تبين الصدز انتي الظاهر لو شافتس فيثاغورس كان غير قانون المثلث و عاد الدراسة على وجهتس ... الا تعالي وش يقرب لتس مثلث برمودا ، ما فيه أزين من العزوبية .. وشوله يا إحساس نعرس ..! حنا لازم نقطع نسلنا كله ، مفروض لو نشوف أحد يقرب لنا نثوّر فيه قبل يعرس ..!
دخلوا عليهم إمهم و الشايب و عيونهم تطلع منها شرار ..

الشايب : الله يقلعكم يا بنات الذين مسفركن ودافع دم قلبي .. وماهمني حتسي الناس يوم قالوا لي وشلون تخليهن يروحن لحالهن واخرتها تطلعن شيف أكثر من أول ..
الله يسامحني يومني خليتكن تغيرن خلقة ربي آآه قلبي قلبي .. ابوووي لااااا اصبر خل نتفاهم بالاول .. الله لا يسامحكن اااه ... ومات ..

أمهم جاها شلل نصفي وبعدين قامت بعد شوي وقالت امزح معكم يا بناتي ماودي نقلبها مسلسل كويتي ..

عآشوا حياة فقر بعد وفاة الوالد .. قطعوا عليهم الضمان والتبرعات من بعد ماشافوا وجههم بالغلط وهما طالعين يكبون الزباله انطردوآ من البيت ورآحوآ للصحراء وصآروآ نلبسون براقع ويرعون غنم و صاروا الحيوانات آصدقآئهم (كيف الحال بثر )

The End (اخس )

اقتباس :

يالله إلى متى وانا قبيحه ، إلى متى و انا كل ما شافني قطو يمشي فوق جدار الحوش نط للبيت الثاني من الروعه ، إلى متى و أنا السبب في كوابيس ورعان الديره ..! ، حتى المعرس ماجاء من قبح وجهي .. الله ياخذ وجهي و يعطيني بداله مثل وجه منيره بنت عمتي حصّه

خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ شفتوآ المعآنآة بس

اقتباس :

جلكسي: شوفي إنتي لتس الكبير و انا لي الصغير

يآعيني ع الثقه وآثقه انه بيأخذتس انتي وخشتس

اقتباس :

فتحت إحسآس عيوني و اتذكر ان التسلبة الجربا جلكسي ما تسبحت لها شهر

الله يقلعتس يآجلكسي ضيعتي علي رزقي << مصدقه حآلتس ان احد بيأخذتس

اقتباس :

" دي عايلة واطية ونصابه وهاتوا الفلوس اللي عليكوا

آخص والله هـ العجوز مي هينه

آخصص والله طلعت مني هينه انآ وذآ القذله اللي تسنهآ ستآرهـ

اقتباس :

عآشوا حياة فقر بعد وفاة الوالد .. قطعوا عليهم الضمان والتبرعات من بعد ماشافوا وجههم بالغلط وهما طالعين يكبون الزباله انطردوآ من البيت ورآحوآ للصحراء وصآروآ نلبسون براقع ويرعون غنم و صاروا الحيوانات آصدقآئهم (كيف الحال بثر )

شفتوآ حآلنآ كيف ؟؟ آرفقوآ بنى <<

وبعدين منو بثر ؟؟ << فضيحه

يسلموووووووو حنوو

ولآتحرمينآ من هيكـ الموآزيع